OLLO: Podes ler toda a película ou ir directamente ó resumo e desenlace (logo da imaxe), picando acó.
Mercas dous billetes de ida e volta, rexistrado como cliente na aplicación de Renfe.
Por temas laborais, anticipas a volta. Tentas facelo pola aplicación, pero non podes, así que chamas ó seu flamante 902.
A persoa que te atende pásate co departamento de soporte para axudarte, pero este decide pasarte co departamento de trocos para que cho fagan todo vía telefónica. Este departamento confírmache o troco, diche que che cobrará 0,30 € pola xestión e que como os novos billetes son lixeiramente máis económicos cós anteriores, abonaranche na tarxeta coa que pagaches 1,70 €. Por último, que che mandarán unha mensaxe para que imprimas os billetes nos dispensadores ó chegar á estación. Chégache a notificación bancaria desa devolución.
Chegas á estación. Como non recibiches ningunha mensaxe, malia que vas ó dispensador de billetes, non tes os datos precisos para imprimilos, polo que vás á xanela de emisión de billetes (importante quedarse co concepto, porque…), onde che din que eles non poden emitir eses billetes e que, se queres, vaias ó mostrador de atención ó cliente ou, pouco menos, ó corno.
Vas ó mostrador de atención ó cliente, onde hai xente agardando para ser atendida con cara de “abúrrome demasiado xa” e ninguén no mostrador. Arestora o tren que vas coller está a piques de saír.
A estas alturas, aplicas o senso común: troquei os billetees, como queira que sexa, o tren que teño mercado agora é este e se o perdo e agardo a arranxar isto, non vou ter billete no que tiña mercado inicialmente. Así que decides subir ó tren que pagaches e se hai algún problema, xa se arranxará sobre a marcha ou ó chegar ó destino.
Pero amigo, chega o momento revisor. Un home de idade avanzada, curtido nos sensabores da vida, probablemente moi canso de aturar parvadas e con moi pouca paciencia, ademas dalgunha saída de ton pouco xustificada. Pero en calquera caso, se o sistema da compañía funcionase como debería, este momento non se produciría xamais. Señor descargado de responsabilidades.
Ó chegar ó destino, achégome ó mostrador de atención ó cliente, comento o tema e finalmente procedo a pór unha reclamación. Por que, se total xa cheguei ó meu destino como pretendía? Pois porque eu tamén estou curtido nos sensabores de Renfe e abondo ata o nariz de que pase o que pase, a culpa sempre sexa do que paga, porque competencia cero, claro.
E porque, segundo nos informaron posteriormente, por subir ó tren “sen billetes” (que estaban pagados, pero non emitidos físicamente), poderían denunciarnos a nós, malia telos mercalos.
Tamén porque segundo parece (no hai coma rañar para sacar merda), estes fallos veñen a ser recurrentes últimamente e bastantes persoas quedaron en terra sen poder subir ó tren porque as máquinas expendedoras (o sistema da propia Renfe), anulan os billetes sen explicación algunha.
Reclaman. Despois de perdido o tren. E devólvenselles os cartos. Pero seguen en terra.
E, por suposto, porque enriba isto é unha pataca quente que ninguén quere que lle estoure. Renfe di que o 902 da súa propia atención ó cliente, aténdeo unha empresa externa… e non é responsabilidade súa!
 |
